ILOILO CITY- Wala nalikawan ang pagluntad sang pila ka mga problema nga naeksperyensiyahan sang Department of Education (DEPED) Region 6 sa una nga adlaw sang face to face classes kahapon para sa school year 2022-2023.
Sa interview sang Bombo Radyo kay Mr. Hernani Escullar Jr., spokesperson sang DEPED Region 6, iya ginpahayag nga may mga pangalan nga nadula sa listahan sang mga enrolled kag may yara man sang nagsalangisag nga mga estudyante nga indi pa nalakip sa face to face classes kahapon apang nagpadulong na sa eskwelahan.
Suno kay Escullar, gilayon naman nga nahatagan solusyon ang amo nga mga problema.
Gintuad naman sang DEPED spokesperson nga mas mataas ang enrollees subong nga tuig nga naglab-ot sa 2,148,517 students.
Sang nagligad nga school year, yara lang sa 2,104,060 ang mga enrolled.
Samtang, may mga eskwelahan na nga nagsugod sang 5 ka adlaw nga in person classes.
Sa elementarya, out of 3220 schools sa bug-os nga rehiyon, 722 ang nagapatigayon na sang 5 days in person classes.
Sa sekundarya, out of 635 schools, may yara sang 99; kag sa mga integrated schools naman , out of 190 schools, may 37 nga nagapatuman sang amo nga sistema.
