ILOILO CITY- Ginpaathag sang isa ka civil engineer kag eksperto sa water resources engineering nga indi basta-basta ang pag-disinfect sa mga bubon paagi sa chlorination.
Sa interview sang Bombo Radyo kay Engineer Nilo Jardeleza, iya ginpahayag nga kinahanglan nga magsanto ang dosage sang chlorine sa kadamuon sang pathogens ukon kagaw sa tubig.
Suno kay Jardeleza, apisar nga nadisinfect na ang bubon, apang kun mahigko sa gihapon ang tubig nga nagahalin sa tuburan, magabalik sa gihapon ang mga pathogens ukon bacteria.
Pahayag sang engineer, mas maayo nga may yara sang sustainable nga treatment sa tubig agud nga mangin safe ini.
Sa subong suno sa natungdan, ang pinaka-practical nga tikang amo nga pabukalan gid ang tubig antes gamiton ilabi na kun ini ang imnon.
