ILOILO CITY-Dismayado ang pamunuan sang National Police Commission (NAPOLCOM) Region 6 sa ginakaulamiran nga kontrobersya sang San Joaquin Municipal Police Station may kaangtanan sa ginapahayag natabo nga mistaken identity sa pag-aresto sa isa ka lalaki may kaangtanan sa kaso nga frustrated murder.
Ini matapos nga ginpa-Bombo sang pamilya ni Leogin Sapan ang San Joaquin PNP bangud sa pagdakop sa iya kag ginlupot sa presuhan bangud gintudlo ini nga suspek sa krimen apisar nga ang magulang sini nga si Lorecito Sapan ang nakasulat sa warrant of arrest.
Depensa naman ni PLt. Dionisio Estacio, hepe sang San Joaquin PNP, matuod nga pangalan ni Lorecito ang una nga nakabutang sa kaso bilang isa sa mga suspek apang nakorehiran na ini sadto pang Nobyembre 2018 kag naislan na nga si Leogin ang matuod nga suspek.
Sa interview sang Bombo Radyo kay Atty. Joseph Celis, director sang NAPOLCOM Region 6, iya ginpahayag nga nagasalalampaw nga violation ang nakumiter sang San Joaquin PNP.
Suno kay Celis,pila sa mga red flags amo ang pag-ako sang San Joaquin PNP nga sala ang nabutang nga pangalan sa warrant of arrest kag ang pag-aresto sa lain nga tawo apisar nga lain man nga tawo ang nakabutang sa arest warrant.
Dugang pa ni Celis, kwestyonable man nga apisar ginaalegar ni Estacio nga naislan ni Lorecito, apang ini sa gihapon ang nakabutang sa dokumento sa kaso nga ginbasehan sa pagdakop kay Leogin.
Nagpaandam naman si Celis sa San Joaquin PNP sa posible salabton nila may kaangtanan sa kontrobersiya.
