ILOILO CITY- Nagsaka pa sa apat ang numero sang patay kag masobra 100 ang nakaangkon sang injury kasunod sang paglaslas sang Typhoon Nanmadol sa Japan.
Suno kay Bombo Josel Palma, international correspondent sa Japan, sa mga injured, 14 sa ila ang kritikal ang kahimtangan.
Ginpahayag ni Palma nga sa subong, ginabanta nga 300,000 ka mga balay ang wala sang kuryente.
Matandaan nga nag-landfall ang bagyo sa southern island sang Kyushu sang Domingo.
Ini ang may pagmadlos sang hangin nga tubtob sa 234km/h,kag nagguba sang mga balay kag nag-disrupt sang transportasyon kag mga negosyo.
Naapektuhan man ang capital nga Tokyo nga nakaeksperyensiya sang mabaskog nga pag-ulan.
Nakansela man ang bullet train services, ferries kag nakansela man ang ginatos ka mga flights.
Nahibaluan nga may prediksyon ang mga scientists nga mangin season sang active hurricane ang tuig 2022 bangud man sa natural phenomenon nga ginatawan nga La Niña.
Ang mainit nga sea surface temperatures sa Atlantic kag Caribbean bilang resulta sang climate change ang mahimo man mag- impact sa frequency kag intensity sang hurricanes.
