Electricity rate sa Iloilo City, nadugangan sang P3.34 per kWh subong nga Septyembre

ILOILO CITY- Nagsaka ang total residential electricity rate sa mga konsumidor sang MORE Electric and Power Corporation subong nga Septyembre.

Madugangan ini sang P3.34 per kWh, gani ang P9.14 per kWh sang Agusto ang mangin P12.48 per kWh subong nga bulan.

Sa statement nga ginpagwa sang MORE Electric and Power Corporation, nasaad nga sang nagligad nga 14 ka bulan, manubo ang generation rate bilang resulta sang pagtinguha sang kompaniya nga mag-source sang pinaka cost-effective power generation supply paagi sa power supply contract sa Power Sector Assets and Liabilities Management Corporation nga may average Time-of-Use rate nga P3.6 per kWh.

Apang, indi na ini maka- supply sang long-term power requirements sang MORE Electric and Power Corporation bangud natapos na ang kontrata sang Power Sector Assets and Liabilities Management Corporation sa Unified Leyte Geothermal Power Plant, nga ginakuhaan sini sang power.

Kasunod sini, kinahanglan sang MORE Electric and Power Corporation nga magpaidalom sa Competitive Selection Process nga ginamando sang Department of Energy nga ginatawag nga competitive bidding sa mga generation companies agud maka-secure sang pinakabarato nga power supply.

Sa idalom sang Competitive Selection Process, naghatag ang coal-fired power plants sang lowest rate sa MORE Electric and Power Corporation sa P2.91 per kWh, mas manubo sa P3.6 per kWh sang Power Sector Assets and Liabilities Management Corporation bangud nga 60 USD per metric tons lang ang coal price sang amo nga tion.

Apang, nagtimbuok ang presyo sang coal humalin sa ulihi nga quarter sang 2021 tubtob subong, nga may average price nga 405 US Dollars per metric ton,nga nagtaas sang 575%.

Bilang resulta, ang increase sa rate ang mabatyagan sang mga konsumidor bangud sa pagtaas sang generation charges sang power suppliers sang MORE Electric and Power Corporation.

Ini nga charges gikan sa Power Supply Agreements ang bangud sa nagapabilin nga mataas nga coal prices sa global market.

Gin-athag naman sang MORE Electric and Power Corporation nga ang generation kag transmission charges ang pass-through kag ginabayad sa power suppliers kag grid operator.

Sa liwat, P12.48 per kWh na ang total residential electricity rate sa mga konsumidor sang MORE Electric and Power Corporation subong nga Septyembre.