ILOILO CITY- Ginakasubo sang business sector sa Iloilo City ang pagtaas sang presyo sang kuryente.
Sa announcement sang MORE Electric and Power Corporation, madugangan ang electricity rate sang P3.34 per kWh, gani ang P9.14 per kWh sang Agusto ang mangin P12.48 per kWh subong nga Septyembre.
Sa interview sang Bombo Radyo kay Engr. Terence Uygongco, chairman sang Iloilo Economic Development Foundation, Inc., iya ginpahayag nga magaigod gid ang mga magagmay nga mga negosyante.
Suno kay Uygongco, nagaamat-amat pa lang sa pagbangon ang kalabanan nga mga negosyo bangud sa pandemya kag ang pagsaka sang presyo sang kuryente ang magapabudlay pa sa ila recovery.
Ginpahayag ni Uygongco nga sa dalayon, ginalauman nga ipasa sang mga negosyante sa consumers ang mataas nga presyo sang kuryente paagi sa pagpataas sa presyo sang ila mga produkto.
Dugang niya, isa man sa posible nga epekto sini amo nga mamuhin sang manpower ang mga negosyo sa syudad agud mapamag-an ang impact sang mataas nga electricity rate.
Para naman sa ordinaryo nga konsumidor sang MORE Electric and Power Corporation, wala na ini sang mahimo kun may pagtaas gid man sa presyo sang kuryente.
Suno kay Arlyn Alvarez sang General Hughes, Iloilo City Proper, bululigan na lang nila ang pagbayad sang kuryente bangud may yara man sila sang unity.
