ILOILO CITY- Ginasuguran na sang Department of Public Works and Highways ang pagpatigayon sang temporary shoring sa Ungka flyover.
Ang shoring isa ka sahi sang support nga ginagamit sa tion sang repair ukon original construction sang buildings kag sa mga excavations.
Sa interview sang Bombo Radyo kay Engineer Jose Al Fruto, Assistant Regional Director sang Department of Public Works and Highways, iya ginpahayag nga magabutang sila sang shoring jack sa 4 ka haligi sang flyover partikular sa nagausmod nga porsyon.
Suno kay Fruto, magalawig sang duha tubtob tatlo ka semana ang pagtukod sang temporary shoring.
Pahayag niya, sa subong, gina-finalize na ang recommended applicable engineering intervention agud nga sa tion nga matapos na ang temporary shoring, masuguran man ang pagpatigayon sang applicable nga intervention sa amo nga “vertical displacement” sa flyover.
Nahibaluan nga ginpasirado anay sa motorista ang flyover bangud sa amo nga problema sa istruktura.
