ILOILO CITY- Ginakabig nga dako nga bugal sang Iloilo Provincial Government nga napilian sang World Health Organization ang probinsya agud mangin venue sang labing una nga selebrasyon sang World Heart Day diri sa Pilipinas.
Ang World Heart Day ang hiwaton sa Septyembre 29, 2022 sa Iloilo Provincial Capitol.
Suno kay Dr. Ma. Socorro Quiñon, Head sang Iloilo Provincial Health Office, sa amo nga adlaw, may yara sang itanyag nga Carousel of Health Services sa Capitol lobby sa diin tanan mahimo gid nga mag avail sang libre nga Health Services.
Ini nga mga serbisyo ginalakipan sang PinasLakas COVID-19 Vaccination; Family Planning Services; Human Immunodeficiency Virus testing kag Screening sa Department of Health Mobile Diagnostic Center; Mental Health Counselling/Nutrition Councelling; Cardio Vascular kag iban pa nga Non-Communicable Diseases Risk Assessment kag Screening; Optical Examination; Blood Typing sa Philippine Red Cross Booth; Philippine Health Insurance Corporation (Queries) Booth kag iban pa.
Ini nga mga serbisyo maga-umpisa alas 9 sa aga tubtob alas 3 sa hapon sa Sept. 29.
Sa alas-sais sang gab-i, may yara sang Illumination sa bilog nga capitol facade nga pasigahon sang World Health Organization kag World Heart Federation.
Nahibaluan nga napilian ang probinsya sang Iloilo nga mangin venue sang World Heart Day matapos nga nakabaton sang pagdayaw ang probinsya halin mismo sa World Health Organization bangud sa epektibo nga implementasyon sang Healthy Hearts Project.
Ang World Heart Day nga gin-establish sang 1999 sang World Heart Federation upod sa World Health Organization ang isa ka global campaign nga nagasentro sa promosyon sang healthy nga tagipusuon kag proteksyunan ini batok sa mga balatian.
