ILOILO CITY- Magalawig sang duha ka adlaw antes mapagwa ang resulta sang luminol test nga ginpatigayon sang Forensic Unit Region 6 bilang kabahin sang imbestigasyon may kaangtanan sa Estancia massacre.
Sa interview sang Bombo Radyo kay PSMS Francisco Lindero Jr., iya ginpahayag nga kalakip sa mga lugar kun sa diin ginhimo ang luminol test amo ang puluy-an sang lone survivor nga si Jevron Parohinog.
Suno kay Lindero, tanan nga areas sang balay kag tanan nga hulot ang ginpaidalom sa luminol test.
Magluwas sa balay, ginhimo man ang test sa sulod kag guwa sang ice plant kalakip na ang sotragrmalapit sa puluy-an sang ginakabig man nga person of interest nga si Parojinog.
Nalakip man sa ginpaidalom sa luminol test ang Sports Utility Vehicle nga ginsakyan sang mga biktima kag amo ang ginmaneho ni Parojinog.
Ang luminol isa ka kemical nga gina-spray agud ma-detect kun may dugo sa crime scene kag apisar indi makita ang dugo, naga-react ini sa kemikal kag nagaresulta sa pag-emit sang duag tagum ukon blue nga kaangay nga nagasanag ini kun yara sa madulom nga area.
Samtang, ginkumpirma naman ni Lindero nga wala pa nakapasa si Parohinog sang waiver sa Special Investigation Task Group agud maturn-over na ang iya cellphone sa Regional Anti CyberCrime Unit para sa forensic examination.
Nahibaluan nga ginhatagan si Parohinog sang kutob alas-dose kaina sang kaagahon nga ultimatum.
Bangud sini, isyuhan na lang sang cyber warrant si Parohinog agud mahatag na sa Regional Anti CyberCrime Unit ang iya cellphone.
