ILOILO CITY- Nadakpan na ang notoryus nga kawatan nga nagpangbiktima sa madamo na nga commercial establishments kag mga balay sa Iloilo City.
Ini amo si Deonard Mesa, 48,residente sang Brgy. Kasing-kasing, Molo, Iloilo City kag nagatrabaho bilang isa ka glass installer.
Sa interview sang Bombo Radyo kay PCapt. Eduardo Siacon Jr., hepe sang Jaro Police Station, iya ginpahayag nga ginsulod ni Mesa ang isa ka tutorial school sa isa ka Condominium Building sa Brgy. San Vicente, Jaro, Iloilo City.
Suno kay Siacon, na-monitor sang maintenance personnel sang amo nga building ang closed circuit television kag nakit-an si Mesa sa sulod sang amo nga opisina.
Didto na kag ginkadtuan sang duha ka personnel sang condominium si Mesa kag nadakpan ini sa akto.
Nagtuyo pa nga magpalagyo si Mesa apang napunggan ini sang duha ka nasambit nga personnel.
Narecover sa iya ang cash nga 12,590.00 kag tatlo ka cellphones nga iya sang tutorial school.
Preso na ini subong sa Jaro Police Station.
