Gin-aprubahan sang Department of Agriculture ang importasyon sang 25,000 metric tons sang isda sa pungsod agud nga masiguro ang suplay sang isda sa closed fishing season.
Sa guidelines nga gin-isyu sang ahensya, nakasaad nga ginapahanugutan ang importasyon sang frozen round scad ukon galunggong, bigeye scad, mackerel, bonito, kag moonfish halin sa Nobyembre subong nga tuig tubtub sa Enero 2023.
Sa tion sang closed fishing season, ginadumilian ang daku nga mga korporasyon nga magpangisda sa sulod sang tatlo ka bulan agud nga mapahanugutan nga magdamo ang mga isda sa dagat.
Dapat man nga ma-isyu ang import clearances halin sa Disyembre 15, 2022 kag mangin valid ini sa sulod sang 45 ka adlaw.
Gina-engganyo man sang Bureau of Fisheries and Aquatic Resources ang importers nga ibaligya ang imported fish antes magbukas ang fishing season sa Pebrero 2023.
