Nagalaom ang mga tricycle drivers nga matuman ang pasalig sang Department of Transportation nga makumpleto ang pagpanagtag sang fuel subsidy sa Enero 2023.
Matandaan nga sa ginpatigayon nga hearing sang Commission on Appointments sa ad interim appointment ni Transportation Secretary Jaime Bautista, iya ginpahayag nga mahatagan nila sang 60% nga ayuda ang mga beneficiaries sa katapusan sang tuig 2022 kag matapos ang full payment sa nabilin nga 600,000 tricycle drivers sa tunga-tunga sang Enero sa madason nga tuig.
Sa interview sang Bombo Radyo kay Pepito Tabuada, presidente sang Quintin Salas Trisikad and Tricycle Drivers Association, iya ginpahayag nga humalin pa sang Marso sila nagahulat sang ihatag nga ayuda, apang nalab-utan lang sang Disyembre, wala sila sa gihapon nakabaton sang ayuda.
Una na nga ginpahayag sang gobyerno nga ang mga tricycle drivers ang makabaton lang sang ₱1,000 nga ayuda kada isa sa baylo nga ₱6,500 nga amo ang ginahatag sa mga jeepney drivers.
Isa sa mga ginatudlo rason sa manubo nga ayuda sang mga tricycle drivers amo nga gamay lang ang ila konsumo sa gatong kun ipaanggid sa mga jeepney kag bus.
Suno kay Tabuada, nakigsapol na siya sa Iloilo City Public Safety and Transportation Management Office kag tiglawas sang Committee on Transporation sa Iloilo City Council.
Apang manugtapos na ang tuig, wala sila sang may nabaton nga fuel subsidy.
Gin-ako man sini nga indi makaigo ang ₱1,000 nga ayuda nga ila natalana nga batunon.
