Nagadepende sa gihapon sa Local Finance Committee sang Iloilo Provincial Government kun san-o na mabaton sang regular kag casual-plantilla employees sang Iloilo provincial capitol ang indi maglapaw sa P25,000 Collective Negotiation Agreement Incentive, amo man ang Service Recognition Incentive kag one-time rice allowance.
Sa interview sang Bombo Radyo kay Iloilo 4th District Board Member Domingo Oso Jr., iya ginpahayag nga
apisar naaprubahan na sang 14th Sangguniang Panlalawigan ang Supplemental Budget No. 2 balor P35,250,000 for General Fund kag P1,798,948.66 for Local Economic Enterprise, apang ginapangitaan pa sang source sang pondo sang Local Finance Committee.
Nahibaluan nga ang makabaton sang Collective Negotiation Agreement Incentive amo ang kapin 1,400 capitol employees nga regular kag casual-plantilla.
Ang regular kag casual-plantilla employees sang 12 ka district hospitals kag Iloilo Provincial Hospital ang makabaton man sang amo nga incentive apang maga-depende ang ila batunon sa savings sang hospital.
Wala naman madala ukon indi makabaton sang CNA Incentive ang job hires and contract of service.
Sa pagabatunon naman nga service recognition incentive para sa mga empleyado sa idalom sang executive department sa probinsya kag ang one-time rice allowance para sa tanan nga government personnel subong nga tuig, ginpahayag ni Oso, nga ginahulat man ang Local Finance Committee kun makapangita sang available fund.
Suno kay Oso, sa tion nga may yara sang kuhaan sang pondo kag makapagwa sang certificate ang committee, sunod nga magapasar sang ordinansa ang Sangguniang Panlalawigan agud ma-release na ang kwarta.
Kun matigayon ini, hingagawon ang pagpasar sang ordinanda sa ila sesyon sa Disyembre 27 agud mahingagaw ang pag-release sang amo nga incentives antes magtakop ang tuig ukon sa una nga semana sang 2023.
