Wala na ginasapubliko sang China ang adlaw-adlaw nga numero sang Covid-19 cases sa pungsod.
Wala man ginpaathag sang National Health Commission (NHC) kun ngaa islan ang ila policy sa pagbalhag sang figures apisar nga amo na ini ang nakaandan halin sang 2020.
Suno sa komisyon, iga-publish lamang sang Chinese Center for Disease Control and Prevention ang kinahanglanon nga Covid-19 information para sa reference kag research, apang wala man gin-detalye kun ano ka-regular ipaguwa ang data.
Matandaan nga sang pag-umpisa sang Disyembre, ginhalugan sang China ang ila nga istrikto nga zero-Covid policy kasunod sang pag-protesta sang mga tawo sa dalanon.
Halin sang gin-lift na ang mga restrictions, anum pa gid lamang ka Covid-19 deaths ang na-report sa amo nga pungsod.
Sang nagligad nga semana, may yara sang health data firm sa Britanya nga nagsaad nga may ginabanta masobra isa ka milyon nga kaso sang Covid-19 kag masobra 5,000 ka patay sa China kada adlaw.
Lain ini ipaanggid sa report sang National Health Commission nga zero COVID-19 deaths sa China sa nagligad nga apat ka adlaw.
Ginapatihan sang mga eksperto nga kabahin ini sang tikang sang pungsod agud nga mabuhinan ang numero sang nagaguwa nga patay nga naangot sa virus.
Wala man sang nabaton nga data ang World Health Organization halin sa China may kaangtanan sa bag-o nga COVID hospitalisations halin sang ginpahalugan ang ila nga mga restrictions.
