ILOILO CITY- Ipatuman ang signal jamming sa Iloilo City sa tion sang Dinagyang Festival 2023 celebration.
Apang ini ang limitado lamang sa mga areas nga venue sang major events kag indi ang bilog nga syudad kaangay sang ginpatuman sang mga selebrasyon sang nagliligad nga tinuig.
Ini ang magasakop sang Iloilo Freedom Grandstand, Plaza Libertad, Plazoleta Gay, Provincial Capitol, Delgado kag Quezon Streets, kag sa Central Market kag amo man sang University of Iloilo kun sa diin patigayonon ang “Kasadyahan sa Kabanwahanan” kag Ati Tribes Competition.
Ini ang ipatuman umpisa sa alas-sais sa aga tubtob alas-dos sa hapon sa Enero 21 kag 22.
Ang isa ka signal shutdown ang ipatuman sa ILOmination Tribes Competition kag Parade of Lights sa Enero 21,alas-sais tubtob alas-nueve sa gab-i sa Mandurriao.
Nagpahanumdom naman ang Iloilo City Police Office angot sa ipatuman nga gun ban umpisa sa Enero 13, alas 12:01 sang kaagahon tubtob Enero 22, alas 12:00 sang tungang gab-i.
Dumilian man ang pagdala sang makahulubog nga ilimnon kun nagalakat ukon nagalibot sa syudad sa tion sang festival ukon activities,indi man mahimo maggamit sang drone kun indi accredited sang Iloilo Festivals Foundation Inc., kag dumilian man ang pagpalupok sang firecrackers ukon paggamit sang pyrotechnics kun indi accredited.
Sa interview naman sang Bombo Radyo kay Councilor Rommel Duron, nga amo man ang nagduso sa konseho sang resolusyon sa nga nagaayo sa National Telecommunications Commission kag Philippine National Police sa pag-shutdown sang signal para sa Dinagyang 2023, iya ginpahayag nga para man ini sa seguridad sang publiko agud ma-minimize ang risgo sang posibilidad sang pagpangsabotahe.
Ang naga-isahanon naman nga konsehal nga nagpamatok sa resolusyon amo si Councilor Rex Sarabia.
