ILOILO CITY – Ginahulat na gid lamang sang Police Regional Office VI ang formal request sang Regional Explosives Ordnance and Canine Unit Region VI para sa temporaryo nga salayluhan sa sulod sang regional command sa Camp Teofilo Delgado kasunod sang natabo nga pagsigabong sa ila opisina sa compound sang Iloilo City Police Office.
Sa interview sang Bombo Radyo kay Police Regional Office VI director Police Brigadier General Leo Francisco, iya ginpahayag nga may yara sang isa ka stage sa firing range sa kampo nga mahimo nga mangin temporaryo nga opisina sang Regional Explosives Ordnance and Canine Unit Region VI samtang nga wala pa sang safe nga opisina para sa ila.
Suno kay Francisco, indi maayo ang opisina sang amo nga talatapan sa sulod sang Iloilo City Police Office bangud nga malapit ini sa opisina sang iban nga unit kag malapit sa dalan kun sa diin, madamo ang nagalabay.
Nahibaluan nga una na nga ginpahayag ni Francisco nga maga-request ini sang pondo sa Camp Crame para sa pagpatukod sang kaugalingon nga building para sa Regional Explosive Ordnance and Canine Unit.
