Iloilo – Nakahunong na sa Bail for Immigration Detainees Detention Facility sa Bicutan, Taguig, City ang isa ka Japanese National nga gindakop sang otoridad sa Guimbal, Iloilo.
Ang arestado amo si Yohhei Yano, 43, naga-istar sa Binanua-an Guimbal, Iloilo kun sa diin may isa ka negosyo sa nasambit nga banwa.
Sa interview sang Bombo Radyo kay Police Major Reagan Oriña, hepe sang Barotac Nuevo Municipal Police Station, iya ginpahayag nga nadakpan si Yano sa Guimbal Port sa Brgy. Gerona Gimeno, Poblacion Guimbal, Iloilo sang mga operatiba sang Bureau of Immigration, kaupod ang joint collaborative effort nila sang Guimbal Municipal Police Station.
Suno kay Oriña, nakighimbon si Yano sa kaupod nga Japanese nga si Nakamura Sho sa isa ka robbery incident sa Heaven’s Kaitori Center, Kubota, Yokkaichi-city sa Mie prefecture sa Japan sang 2020 paagi sa paggamit sang tear gas kag kutsilyo.
Nakuha sang mga ini ang 882,992 yen ukon P369,805.61, kag 2,558,340 yen ukon P1,071,457.61, kag 70 gold items nga lunsay may historical value.
Sa arrest warrant nga ginpagwa ni Judge Abe Akihiko sang Yokkaichi Summary Court, si Yano kag Sho ang nagapangatubang sang kaso nga robbery, extortion kag naangot man sa telecommunications fraud.
Nakumpiskar man kay Yano ang iya 9mm caliber kag duha ka assembly magazines nga may 29 rounds sang ammunition
