Ginhaboy nga kasudlan sang baboy sa suba, ‘unsanitary’ kag posible tunaan sang masakit

Iloilo City – Ginakahangaw-an sang mga residente sang Barangay San Pedro, Jaro, Iloilo City ang liwat na naman nga pagkasapo sang kasudlan sang baboy sa ila suba.

Sa interview sang Bombo Radyo kay Punong Barangay Lita Jover, iya ginpahayag nga ginpangkuha na nila ang nagsang-at nga kasudlan sang baboy kag gilayon nga ginlubong.

Suno kay Jover, tuman ka “unsanitary” ang ginhimo sang naghaboy bangud posible ini nga maglapta kag tunaan pa sang masakit.

Nagpanawagan naman ang natungdan sa naghaboy nga kuntani makonsensya ini.

Kuntani suno sa opisyal, sa baylo nga ginhaboy, ginlubong nalang kuntani ini.

Samtang, nagpangayo naman sang bulig si Jover sa Iloilo City Government agud nga ma-imbestigaran kun sin-o ang responsable sa paghaboy bangud posible ini magresulta sa pag-angkon sang balatian sang mga pumuluyo.