Lima ang arestado kag duha ang nakapalagyo sa drug buy bust sa isa ka ginapahayag drug den sa Barangay Benedicto, Jaro, Iloilo City.
Ang mga nadakpan amo sanday Rodel Bayoneta Sr., 46, residente sang Brgy. Benedicto, Jaro; Edmund Bedia, 34, residente sang Brgy. Bagungbung, Barotac Nuevo; Joebert Amolong, 50, residente sang Brgy. Desamparados, Jaro; Christian Magallanes, 37, residente sang Brgy Benedicto, Jaro; kag Ronald Palomar, 44, residente sa Brgy. Benedicto, Jaro.
Ang main target nga nakapalagyo amo si Rodel Bayoneta Jr., 22, residente sang Brgy Benedicto, Jaro. At large man si Romel Bayoneta,20, residente man sang amo nga lugar.
Sa interview sang Bombo Radyo kay Police Captain Lester Oliveros, hepe sang Jaro Police Station, iya ginpahayag nga pasado 1:00 kaina sang kaagahon ginpatigayon ang operasyon sa balay nanday Bayoneta, Jr.
Na-recover ang anum ka sachet sang suspected shabu nga may balor nga P204, 000.
Ginpahayag nga yara sa sulod sang balay ang mga arestado sang ginhimo ang operasyon.
Suno kay Oliveros, isa ka bulan ang monitoring antes ginpatigayon ang drug buy bust.
REKLAMO SANG PAMILYA
Nag-reklamo naman ang pamilya ni Christian Magallanes nga may makaduluda nga natabo sa operasyon.
Sa interview sang Bombo Radyo kay Amalia Magallanes, tiya ni Christian, iya ginpahayag nga ginpwersa lang nga posasan ang iya nga hinablos kag pasudlon sa balay nanday Bayoneta.
Suno sa tiya, nagpugusay pa ang operatiba kag ang iya hinablos sa bomba kag nagkalatumba pa ini.
Gin-alegar pa sang tiya nga may ginsulod sa bulsa sang iya hinablos sang amo nga tion.
Ginrason sini nga yara pa sa guwa si Christian apisar kaagahon bangud naga-inom-inom ini kaupod ang abyan.
Nagpahayag naman ang Jaro Police Station nga alegasyon ini sang pamilya kag kinahanglan lang nila nga pamatud-an sa korte kun ipasaka na ang kaso. ##
