Iloilo – Naalarma ang isa ka guidance counselor matapos ang nangin palaagyan sang isa ka manunudlo sa Cebu City agud kumprontahon ang duha niya ka mga estudyante nga nag-cheat pinaagi sa pag-post online.
Ang ini nga post ang nakaganar sang nagkalain-lain nga reaksyon nagikan sa publiko.
Sa interview sang Bombo Radyo kay Francis Ray Subong, isa ka registered Guidance Counselor, iya ginpahayag nga madamo sang nagakadapat nga nangin intervention ang manunudlo sa baylo nga mag-post online.
Suno kay Subong, kinahanglan kuntani nga istoryahan sang pribado ang isyu ukon ipakonsulta sa Guidance Counselor, ipatawag ang mga ginikanan, kag istoryahon ang kaangay nga mga manunudlo.
Ginpahayag dugang sang natungdan, pananglitan mangin malala man ang cheating, mahimo ini i-refer sa pyschologists, psychiatrists, social welfare development office, kag mga pulis.
Sa subong nga tion, suno kay Subong, ang pagdisiplina sa sulod sang classroom ang nagakinahanglan sang positive reinforcement agud manuto ang mga estudyante kag indi sa mapintas nga paagi.
Samtang, nagpanugyan naman ang natungdan nga kinahanglanon sang tagsa ka mga manunudlo nga mag-upgrade kag mag-upscale sang mga Core Trainings agud madugangan ang ihibalo sa classroom management sa tion nga matabo ang kaangay nga insidente.
Nahibaluan nga ang manunudlo ang naglapas sa polisiya sang Department of Education kag magaatubang sang nagakaigo nga penalidad.
