Iloilo City – Gin-athag ni Iloilo 3rd District Representative Lorenz “Nonoy” Defensor nga hatagan pa sang dugang nga igtalupangod ang pag-amyenda sang economic provision sang 1987 Philippine Constitution sa iban pa nga bahin sang pungsod.
Ini matapos ang ginpatigayon nga public consultation sang Kamara kahapon sa syudad sang Iloilo kun sa diin ang audience ang nagikan sa Panay, Guimaras, kag Negros.
Sa amo nga public dialogue, may nagtambong nga nanuhay-tuhay nga resource persons nga nagapabor kag nagapamatok sa charter change.
Sa interview sang Bombo Radyo kay Defensor nga amo man ang senior vice chairman sang House Committee on Constitutional Amendments, iya ginpahayag nga ang public consultation nagapahanugot sa duha ka bahin nga maplastar ang ila advocacies sa mga nagapamati kag masabat man ang importante nga mga pamangkot.
Suno pa kay Defensor, ginahingagaw na nila tapos ang desisyon sa hagna agud temprano nga matapos ang trabaho sa komitiba kag agud nga temprano man nga mapasaka sa Senado para may tyempo man nga marepaso ang desisyon.
Ginapanan-aw sang mamalidha nga matapos ang desisyon sang Kamara sini nga Marso 2023.
