Iloilo – Naga-guwa sa rekord sang Iloilo Provincial Epidemiology and Surveillance Unit nga halos lunsay kabataan ang infected sang hand, foot, and mouth disease sa 37 ka mga kabanwahanan sa probinsya sang Iloilo humalin sang Enero 1 tubtob Pebrero 11.
Ini bangud sa 1,647 ka mga kaso, 1,500 gid ang naga-edad sang isa tubtob 10 ka tuig.
Sa interview sang Bombo Radyo kay Dr. Maria Socorro Qui on, pinuno sang Iloilo Provincial Health Office, iya ginpahayag nga ginapahugot na ang preventive measures sa probinsya matapos nga nagdeklarar sang outbreak sa nasambit nga balatian.
Nagpanugyan si Qui on sa mga ginikanan nga sa tion nga makitaan sang sintomas ang bata, gilayon ini nga i-isolate kag indi anay pagpaeskwelahon.
Pila sa mga sintomas sang hand, foot, and mouth disease amo ang pagpangatol sang tutunlan kag blisters sa nagkalain-lain nga parte sang lawas.
Nagpaalinton naman ang natungdan sa publiko nga nagakadapat nga maghugas sang kamot, mag-disinfect sang mga gamit, kag likawan ang magkapot sa mata, ilong kag baba agud indi maglapta ang impeksyon.
Sa subong nagapabilin naman nga mataas ang kaso sang amo nga balatian sa mga banwa sang Sta. Barbara, Alimodian, Barotac Viejo, Badiangan, Sara, Passi City, Banate kag Tigbauan.
