Nag-file sang resolution si Senate Minority Leader Aquilino Martin “Koko” D. Pimentel III agud magpatigayon ang Senate Blue Ribbon Committee sang imbestigasyon “in aid of legislation” batok sa nagaduging kag wala sang pagbahar nga agricultural smuggling sa pungsod.
Gin-propose ni Pimentel ang Senate Resolution 477 kun sa diin iya ginpatpat ang negatibo nga resulta sang smuggling sa local farmers kag fisherfolk; ang risgo sa ikaayong lawas sang Filipino consumers; kag ang epekto sa revenues sang gobyerno.
Gingamit man sini ang data nga nadiskubrehan sang Senate Committee of the Whole sang nagligad nga Congress kun sa diin nakasaad nga ang technically smuggled farm-fishery commodities ang nagdangat sa P667.5 million halin sang 2019 tubtub sa 2022.
Sang amo nga tion, may 31 ka smuggling cases halin sa May 2021 kag ang total amount sang smuggled goods ang ginabanta yara sa P848.33 million.
Suno pa sa senador, may yara na sang 22 ka persons of interest nga ginreport sang committee bangud sa ginpahayag large-scale smuggling, apang tubtub subong, wala sang napreso.
Sang Enero lamang suno sa senador, may yara sang at least P19 million nga balor sang illegal sugar nga natukiban samtang may P20 million naman nga balor sang bombay ang nadakpan
Ginpatuman epektibo sang Hunyo 2016 ang Republic Act 10845 ukon ang Anti-Agricultural Smuggling Act apang wala sang natigayon nga na-convict ukon na-preso nga large-scale smugglers tubtub subong. ##
