Tatlo ka tawo ang patay kag masobra 200 ang injured kasunod sang panibag-o nga 6.4 magnitude nga linog nga nagtay-og sa southern Turkey duha ka semana lamang matapos ang makamamatay nga 7.8 magnitude nga linog nga nagpanghalit sa Turkey kag Syria.
Suno sa interior ministry, sa probinsya sang Hatay narekord ang 213 ka injured; samtang ang mga napatay naman ang reported nga yara sa Antakya, Defne, kag Samandagi.
Ginpahayag nga may nagkalahalitan nga mga building sa Antakya kag ginakahangaw-an nga may na-trap man sa Hatay, southern Turkey.
May reports nga nabatyagan man ini mangin sa Syria, Egypt kag Lebanon.
Suno sa White Helmets civil defence group, masobra 100 ka tawo ang injured sa Syria, nag-collapse ang mga building, kag nag-panic ang mga residente.
Suno naman sa Syrian American Medical Society Foundation, lima sa ila mga hospitals ang nakabaton sang indi magnubo 30 ka mga pasyente bangud sa bag-o lang natabo nga linog.
Matandaan nga Pebrero 6 sang natabo ang magkasunod nga mabaskog nga linog sa Turkey kag Syria nga nagbilin sang masobra 46,000 ka mga patay.
Suno sa Turkish authorities, masobra 6,000 ka aftershocks ang narekord halin sang amo nga petsa. ##
