Amat-amat na nga nagakapunaw ang pahayag sang China nga neutral sila sa away sang Ukraine kag Russia.
Ini matapos nagsapol ang top diplomat sang Beijing nga si Wang Yi kay Russian President Vladimir Putin inadlaw antes ang anibersaryo sang pagpang-atake sang Moscow sa Ukraine.
Suno kay Wang, handa ang China kag Russia nga padalumon pa ang ila nga strategic cooperation. Suno naman kay Putin, nagahulag ang relasyon sang duha ka pungsod santo sa kun ano ang gin-plano kag nakalab-ot na ini sa panibag-o nga milestone.
Ginlaragway ni Putin nga kumplikado ang international situation kag importante suno sa iya ang Sino-Russian cooperation agud nga ma-stabilize ang sitwasyon.
Ang high-profile visit ni Wang sa Moscow indi pa amo ang pinaka-ginabantayan bangud may impormasyon nga mismo si Chinese President Xi Jinping ang magakadto kay Putin sa masunod nga mga binulan.
Sang tinalikdan lang nga adlaw, matandaan nga si US President Joe Biden ang sorpresa nga nagbisita sa Ukraine — una nga tion nga nagtapak ang presidente sang Amerika sa war zone nga wala sang aktibo nga presensya sang militar sang USA. ##
