ILOILO CITY – Patay ang tanan nga sakay sang Cessna plane nga nagtibusok sa probinsya sang Isabela.
Suno kay Atty. Constante Foronda, pinuno sang Isabela Incident Management Team, iya ginpahayag nga nakita ang wreckage sang eroplano sa kabukiran matapos ang pila ka semana nga search operations.
Papanaugon sang otoridad ang bangkay sang mga pasahero kun makakuha na sang clearance nagikan sa crime labs kag Scene of the Crime Operatives.
Dugang pa niya, ang wreckage ang dapat nga i-secure samtang nga nagapatigayon sang imbestigasyon ang Civil Aviation Authority of the Philippines agud nga matumod ang rason sang pagtibusok.
Ang bangkay sang mga pasahero ang ginalauman nga ma-retrieve pagkatapos sang tatlo ka adlaw.
Ginkumpirma sang otoridad nga may yara biktima nga nagbulag ang ulo sa iya lawas.
Kung madumduman, sang Enero 24, ang Cessna C206 plane RPC 1174 ang nagtake-off nagikan sa Cauayan Airport sa Isabela, 15 minutos matapos ang alas-dos sa hapon, padulong sa banwa sang Maconacon.
Sakay sa eroplano ang piloto kag lima ka mga pasahero.
Ang piloto ang ulihi nga nagpakig-angut sa air traffic controllers, 19 minutos matapos ang alas dos sa hapon sa Naguilian.
Ini ang ginalauman kuntani nga mag-abot sa Maconacon, 45 minutos matapos ang alas-dos sa hapon.
Suno sa Isabela Provincial Disaster Risk Reduction and Management Office, makanay ang panahon sa Isabela sang naghalin ang eroplano apang ang hangin sa palibot sang Sierra Madre ang tuman ka madlos.
