Villa, Iloilo City – Magapasakop ang 55 tanan ka mga bangka sa Pinta Layag Contest kadungan sang Paraw Regatta 2023.
Katuyuan sang aktibidad nga mapasundayag ang talento kag kultura sang mga local artists sa Panay Island kag Guimaras pinaagi sa pagpinta sang paraw.
Sa interview sang Bombo Radyo kay Mr. Louie Andaya, Presidente sang Junior Chamber International – Iloilo Chapter, iya ginpahayag nga ang paraw nga pintahan ang igapasakup man sa Paraw Race.
Samtang, ginpahayag ni Andaya nga dako ang mangin premyo sang mga magapasakop sa mga aktibidad kun sa diin mahimo mabaton sang mga tagdaog ang masunod:
Sa Category A sang Paraw Sailing, P40, 000 ang mabaton sang magakampyeon, samtang P60, 000 sa Category B kag P96, 000 para sa Category C.
Sa Slalom Race, P12, 000 ang mabaton sang maga-champion sa Category A, P16, 000 sa Category B, kag P20, 000 sa Category C.
Samtang, sa Sinamba sa Regatta nga hiwaton sa Sabado, Marso 18, P64, 000 ang dal-on pauli sang magadaog.
Balantayan man sa pagselebrar sang festivity ang Pinta Regatta: Paraw Painting Competition, Paraw Slalom Competition, Bayle sa Magwayen, Miniature Paraw Making Contest and Exhibit, HIIIT IT!; The Paraw Regatta Festival Ultimate Fitness Challenge, Sinamba sa Regatta, Beach Standup Paddle, Beach Football Tournament 2023, National Ultimate Frisbee Tournament 2023, Beach Volleyball, Paraw Main Race Opening Program, Pinta Tawo, Lechon Contest, kag Lighted Paraw.
Ginpahayag dugang sang natungdan nga magalawig ang Paraw Regatta 2023 tubtob sa Marso 19.
