Naga-guwa sa isa ka Chinese study nga mahimo makalab-ot sa mainland United States of America ang intercontinental ballistic missile (ICBM) nga ipalupad sang North Korea sa sulod lamang sang 33 minutos.
Suno kay Open Nuclear Network analyst Tianran Xu, nagpatigayon ang Chinese scientists sang simulation sang North Korean missile attack sa US kag base sa resulta, mahimo maka-igu ang missile sang Pyongyang sa central US sa sulod lamang sang 1,997 seconds kun mapaslawan ang missile defence systems nga maintercept ini.
Ang pinakahapos nga target suno kay Xu amo ang west coast kag ang east coast.
Sa amo nga pagtuon, ginbasehan ang paglupad sang Hwasongpho-15 missile halin sa central North Korean city nga Sunchon padulong sa Columbia, Missouri.
Ang Hwasongpho-15 isa ka two-stage, nuclear-capable missile nga may operational range nga tubtub sa 8,000 miles.
Ginpahayag man sa pagtuon sang Beijing Institute of Electronic System Engineering nga mahimo maalerto ang US missile defense system 20 seconds matapos nga napalupad na sang North Korea ang missile.
Apisar ginakabig nga masangkad ang kapasidad sang missile defense network sang Estados Unidos sang Amerika, may ginplastar man nga mga kakulangan sa satellite-aided system para sa pag-track sang missiles nga posible rason nga may makalusot.
Gin-release ini nga report antes ginkumpirma sang North Korea nga nagpalupad ini sang intercontinental ballistic missile nga Hwasong-17 ukon ang ginatawag nga “monster missile”.
Ang paglunsar sini nga ginadumilian nga missile ang kadungan man sang ginapatigayon nga Freedom Shield ukon ang large-scale joint military exercises nga ginahimo sang United States kag South Korea nga nag-umpisa sang Lunes. ##
