Iloilo – Maid-id nga gina-monitor sang Philippine Drug Enforcement Agency Region 6 ang mga empleyado sang gobyerno nga naangot sa illegal drug trade.
Ini matapos nga nadakpan ang job hire sang Iloilo City Hall sa ginpatigayon nga buy-bust operation sa Barangay Zamor-Melliza City Proper, Iloilo City.
Ang durugista amo si Rolando Ricarte Bajenio, 44, kag residente sang Preciado St., San Jose, Antique.
Narekober kay Bajenio ang 14 grams sang suspected shabu nga may standard drug price nga nagdangat sa P 95,200.
Sa interview sang Bombo Radyo kay Atty.Bomrad Soc Abonado, spokesperson sang ahensya, iya ginpahayag sa tion nga may mabaton ang mga ini nga impormasyon nga may empleyado nga naangot sa iligal nga droga, gilayon ini nga ginapa-verify.
Suno kay Abonado, nagapakig-angot man ang mga Local Government Units sa Western Visayas pinaagi sa pagpasa sang mga pangalan sang trabahante nga naangot sa baligyaanay sang droga.
Ginpahayag dugang sang natungdan nga mismo ang Philippine Drug Enforcement Agency ang nagapatigayon sang random drug test sa mga empleyado.
Sa subong, nagapadayon ang monitoring sang Philippine Drug Enforcement Agency Region 6 sa tanan nga areas sa Western Visayas agud mapapas ang tanan nga durugista.
