Ginpatay sang isa ka 28-anyos nga babayi ang tatlo ka kabataan kag tatlo ka staff sang isa ka private elementary school sa Nashville, Tennessee sa Estados Unidos sang Amerika.
Matapos ang pagpang-atake, natigayon man nga napatay sang mga pulis ang suspek.
Sandig sa inisyal nga impormasyon, dala sang suspek ang duha ka assault rifles kag handgun sang nagsulod ini sa Christian Covenant School kag sunod nga nagpinangluthang sa iya mga nakit-an.
Nagbato pa ini sa mga nagresponde nga pulis sa insidente rason nga naiguan man sang bala kag napatay.
Ginapahayag nga residente man sang Nashville ang suspek apang gina-imbestigaran pa subong ang motibo sang krimen.
Ginpahayag man ni Metro Nashville Police Chief John Drake nga na-identify nila ang assailant apang wala pa gin-release ang pangalan.
Ginkumpirma man nga former student man ini sang Covenant School nga iya ginsulod kag gin-atake.
Ini nga hitabo ang pinakaulihi sa serye sang pagpangluthang sa campuses sa Estados Unidos sang Amerika. ##
