Iloilo – Ginpasigurado sang Department of Agriculture nga wala sang rice shortage sa Westen Visayas subong nga tuig.
Sa interview sang Bombo Radyo kay Engr. Jose Albert Barrogo, Regional Technical Director sang Department of Agriculture-Western Visayas, iya ginpahayag nga sa subong 120% nga bastante ang supply sang humay sa rehiyon.
Suno kay Barrogo, self-sufficient ang Western Visayas kun rice production ang pagahambalan sa diin nagadangat sa 2,321,593 metriko tonelada ang rice production.
Nahibaluan nga ang isa ka tonelada ang may equivalent nga 1,000 kilograms.
Kun isa-isahon, ang Antique ang pinakabastante nga 185%, Capiz nga may 165%, Iloilo nga may 154%, Guimaras nga may 138%, Aklan nga may 91% kag Negros Occidental nga may 82%.
Ginpahayag sini nga dako ang nabulig sang pag-ulan sang 1st quarter subong nga tuig agud mangin maayo ang pagtubo sang humay.
Ang 1st quarter ang naga-umpisa sa bulan sang Enero kag magatakop sa katapusan sang Marso.
Sa subong, naga-amat-amat naman harvest sang humay ang mga mangunguma.
Ginalauman man suno sa natungdan nga mangin mataas ang rice production sa 1st quarter subong nga tuig.
Nagadihon naman sa subong sang plano ang ahensya agud mabuligan ang mga mangunguma sa posible pagsulod sang El Niño sa last quarter sang tuig ukon sa Oktubre tubtub Disyembre.
Ginalantaw man nga mangin advantage sa mga mangunguma ang temprano nga pagtanom sang humay agud maka-harvest na antes pa man mag-igo ang bagyo nga masami nagaluntad sa katapusan sang tuig.
