May mga nakit-an na nga senyales sang improvement sa kondisyon ni Pope Francis samtang nagapabilin ini gihapon sa ospital sa Roma bangud sa gina-suprer nga respiratory infection.
Suno kay Vatican spokesman Matteo Bruni, nakapahuway sang maayo ang 86-anyos nga Santo Papa matapos gin-admit sa Gemelli hospital kag pagkatapos sang pamahaw, nagbasa na ini kag nagbalik na sa trabaho.
Sang panyaga naman, nagpadulong na ini sa gamay nga chapel sang isa ka private apartment kun sa diin ini nagpangamuyo.
Mangin si Pope Francis ang nagpalab-ot man sang pagpasalamat sa mga tumuluo nga nagpangamuyo para sa iya kondisyon.
“I am touched by the many messages received in these hours and I express my gratitude for the closeness and prayer,” suno sa iya nga tweet.
May ginpaguwa man nga video message si Apostolic Nuncio to the Philippines Archbishop Charles Brown nga nagahingyo sa Filipino faithfuls nga magpangamuyo para sa Argentine Pope para sa maayo nga lawas kag madasig nga pag-ayo.
Matandaan nga antes gindala sa ospital, nakit-an pa sang iya weekly audience sa Vatican nga maayo ang pamatyag ni Pope Francis apang nakit-an man sang ulihi nga nagkuriit ini kag ginbululigan na nga makasulod sa salakyan kag gindala sa ospital.
Nahibaluan nga naga-suprer man ang Argentine pontiff sang chronic knee pain rason nga nagasakay ini sa wheelchair.
Ang Gemelli Hospital sa Rome amo man ang ospital kun sa diin nagpaidalom ang Santo Papa sa operasyon sa iya nga colon sang 2021 matapos nagsuprer sang diverticulitis, isa ka inflammation sang pockets nga naga-develop sa lining sang intestine. ##
