Iloilo City – Nagabakas ang City Environment and Natural Resources Office sa pagpasiguro nga indi magkalamatay ang nga tanom sa syudad sang Iloilo.
Ini ang bangud sa tuman nga kainit nga panahon.
Sa interview sang Bombo Radyo kay Engineer Niel Ravena, pinuno sang City Environment and Natural Resources Office, iya ginpahayag nga nagmando na siya sa iya mga personnel nga damuon ang tubig nga ibunyag sa mga tanom sa syudad.
Nagaplano man ang opisina nga tempranuhon pa sa aga ang pagpamunyag agud mas mangin maayo ang epekto sa mga tanom.
Suno kay Ravena, tuman kadako ang nabulig sang water detention tank sa La Paz bilang source sang tubig nga ginabunyag sa mga tanom.
Ginpaathag sini nga yara sa 1, 300 cubic meters sang tubig-ulan ang natipon sang water detention tank nga sarang makabunyag sa mga tanom sa syudad sa sulod sang duha ka bulan.
Dugang pa sang natungdan, adlaw-adlaw ang ila nga pagpamunyag sa mga tanom sa plaza kag subong man sa Esplanade.
