Iloilo City – Gintugyan na ni Iloilo City Lone District Representative Julienne “Jam-Jam” Baronda ang 18 ka mga emergency response vehicle sa mga kabarangayan sa syudad sang Iloilo.
Ini agud mas mapasanyog ang pagresponde sang mga barangay sa tunga sang emerhensya.
Sa exclusive interview sang Bombo Radyo kay Representative Baronda, iya ginpahayag nga isa sa mga barangay sa kada distrito ang ginpili nga tugyanan sang salakyan base sa population density kag vulnerability to disasters.
Suno kay Baronda, nalakip sa mga barangay nga nakakuha sang emergency response vehicle amo ang Barangays Veterans Village, City Proper; San Vicente, Jaro; West Habog-habog, Molo; PHHC Block 17, Mandurriao; Bo. Obrero, Lapuz; Lopez Jaena Norte, Lapaz; kag Bonifacio, Arevalo, Iloilo City.
Sa subong, ginatinguhaan sang mamalidha nga mahatagan sang dugang nga 20 ka mga emergency response vehicle ang iban pa nga mga barangay sa syudad.
