Gin-anunsyo sang Saudi Arabia kag sang iban pa nga mga pungsod nga myembro sang Organization of Petroleum Exporting Countries nga panubuan pa gid ang ila nga produksyon sang produktong-petrolyo sang ginabanta 1.15 million barrels kada adlaw.
Ini nga desisyon suno sa gas analysts ang ginapanan-aw nga magapasaka na naman sang presyo sang produktong-petrolyo.
Sa bahin sang Russia, gin-anunsyo sang deputy prime minister nga ang voluntary cut sang pungsod ang magadangat sa 500,000 barrels per day tubtub sa katapusan man sang 2023.
Ang United Arab Emirates, Kuwait, Iraq, Oman kag Algeria ang nagpahayag man nga boluntaryo nila nga buhinan ang ila nga output sa langis sa amo man nga period.
Sa United Arab Emirates, 144,000 bpd ang ibuhin; 128,000 bpd sa Kuwait; 211,000 bpd sa Iraq; 40,000 bpd sa Oman; kag 48,000 bpd sa Algeria.
Ginrason sang Saudi energy ministry nga ang pagbuhin sang Saudi sa ila produksyon ang isa lang ka precautionary measure agud nga masuportahan ang stability sang oil market.
Kun matandaan, sang nagligad nga Oktubre, nag-anunsyo man ang mga pungsod nga naga-export sang langis nga magabuhin sang outputs nga 2 million barrels per day halin sa Nobyembre tubtub sa katapusan sang 2022.
Ginkaakig ini sang Estados Unidos bangud kun magagamay ang suplay sang langis, mas magasaka ang presyo.
Una na nga gin-insister sang Estados Unidos sang Amerika nga kinahanglan nga mapabilin kuntani nga manubo ang presyo sang produktong petrolyo agud masuportahan ang economic growth kag malikawan nga makaganar si Russian President Vladimir Putin sang revenue agud may pondo ini para sa gyera sa Ukraine.
Apang bangud sa wala ginlauman nga anunsyo sang Organization of Petroleum Exporting Countries, buot silingon sini, dugang pa gid ini sa ibuhin sa produksyon magluwas sa una na na-anunsyo sang 2022. ##
