ILOILO CITY – Nagpanawagan ang Iloilo City Police Office sa ginaalegar nga suspek sa kamatayon sang massage therapist sa Queen’s Court Inn, Barangay Bolilao, Mandurriao, Iloilo City nga magsungka na sa otoridad.
Ang biktima amo si Christine Gabayeron, 38, temporaryo nga nagatinir sa syudad sang Iloilo apang residente sang Barangay Bacjawan Sur, Concepcion, Iloilo.
Samtang ang suspek naman amo si Rommel John Celestre y Escasa, alyas “Dikit”, ginabanta nga naga-edad sang 21-22 anyos.
Pila sa mga gintumod nga address sini amo ang Zone 1A, Brgy. Balabago, Jaro, Iloilo City;Calumpang Molo; Monticielo, Pavia; kag Sitio.Dumalagdag, Brgy. Bugnay, Jordan, Guimaras.
Sa interview sang Bombo Radyo kay Police Major Shella Mae Sangrines, spokesperson sang Iloilo City Police Office, iya ginpahayag nga indi pa matul-id ang motibo sa pagpatay sang biktima bangud madamo sang ginasundan nga mga anggulo ang kapulisan.
Suno kay Sangrines, nagpakig-angot na ang mga kapulisan sa mga informants agud madakpan ang suspek.
Matandaan nga nasapwan nga duguon kag wala na sang kabuhi ang biktima sa lodging house kun sa diin ulihi nga naka-upod sini ang suspek.
