Gindala ni Pope Francis sa iya nga Holy Mass kag “Urbi et Orbi” ukon “To the City and to the World” message kag blessing ang pagpangamuyo para sa mga pumuluyo sa Ukraine kag ang pag-apelar nga kuntani buksan na ang pagpanghuna-huna sang Russians sa invasion nga ginhimo sang Moscow masobra isa ka tuig na ang nakaligad.
Nagpangabay man ang Santo Papa nga kuntani makabalik na sa ila tagsa ka puluy-an kag sa ila mga pamilya ang mga na-preso kadungan sang gyera.
Kaangay sang iya ginahimo sa kada Easter, naghingyo man ang 86-anyos nga Santo Papa sang kalinong sa Middle East.
Partikular man nga gintumod ang ginamo sa Jerusalem kag amo man sa Israel, Lebanon, kay Syria.
Matandaan nga nagsaka pa ang tensyon sa tunga sang Israelis kag Palestinians halin sang ginpatigayon ang Israeli police raids sang nagligad nga semana sa Al-Aqsa mosque sa Jerusalem.
Sa iya mensahe, gin-mensyonar man sang Santo Papa ang sitwasyon sa Lebanon; ang martir nga mga Rohingya sa Myanmar nga ginpangabay nga kuntani makaangkon na sang hustisya; kag ang apelar sa dugang nga bulig para sa mga biktima sang linog sa Turkey kag Syria kun sa diin malapit 56,000 ka mga tawo ang nagkalamatay.
Gin-mensyonar man sini ang mga tumuluo sa Nicaragua matapos nga nag-lala pa ang relasyon sa tunga sang gobyerno kag sa Simbahang Katolika sa amo nga pungsod.
Ini nga mensahe kadungan sang Easter Sunday ang ginpangunahan ni Pope Francis sa St. Peter’s Square matapos napilitan ini nga ipaiway ang pagtambong sa outdoor service sang Byernes Santo bangud sa tuman ka lamig nga panahon.
Nahibaluan nga sang nagligad nga semana lang nakaguwa sa ospital ang Santo Papa bangud sa ginsuprer nga bronchitis.
