ILOILO – Nagpartisipar ang 120 ka mga mangunguma sa ‘MorPRoGRes Garden’ sang Semana sang Iloilo nga nagpasundayag sang mga agriculture kag fisheries products and technologies.
Ini ang isa sa mga aktibidad nga ginapabugal sang Iloilo Provincial Government kun sa diin ang mga food harvest ang ginapahayag nga “beautiful, edible, kag recycable”.
Sa interview sang Bombo Radyo kay Dr. Ildefonso Toledo, Provincial Agriculturist, iya ginpahayag nga bukas ang garden sa publiko subong, Abril 11 tubtob Abril 14.
Suno kay Toledo, mahimo nga makit-an sa garden ang preska nga mga horticultural crops kag mga utan nga ginalakipan sang bentaha nga mga ‘hugot kag pick-up lines’.
Ginpahayag dugang sang natungadan nga ang MorPRoGRes Garden ang ginalakipan sang produksyon sang mga high-value crops para sa food security, blending sang ornamental gardening kag landscaping, kag pag-gamit sang recycled/upcycled materials bilang solusyon sa climate change.
Nahibaluan nga subong nga adlaw nag-umpisa ang selebrasyon sang Semana sang Iloilo may kaangtanan sa ika-122 nga founding anniversary sang probinsya.
