ILOILO – Dead on arrival sa ospital ang isa ka lalaki matapos nga ginbuno sang iya kasimaryo sa Barangay Lanas, Barotac Nuevo, Iloilo.
Ang biktima amo si Frederick Cabalfin, 41, nagatrabaho bilang driver samtang, ang suspek naman amo si Herman Saul, 42, kag lunsay residente sang nasambit nga lugar.
Sa interview sang Bombo Radyo kay Police Lieutenant Nerio Gicole, deputy chief sang Barotac Nuevo Municipal Police Station, iya ginpahayag nga nagapungko ang biktima sa waiting shed sang ginbuno sang suspek sa tyan.
Suno kay Gicole, yara sa idalom sang impluwensiya sang makahulubog nga ilimnon ang suspek sang ginhimo ang krimen.
Ginpahayag dugang sang natungdan nga ginalantaw sini nga motibo sa pagpatay ang daan nga hilugut-anon sa tunga sang duha.
Nahibaluan nga nagalaba sang 12 ka pulgada nga kutsilyo ang gingamit sang suspek sa pagbuno sa biktima.
Preso na karon ang suspek sa Barotac Nuevo Municipal Police Station kag magaatubang sang kaso nga murder.
