Nagmandu si Chinese President Xi Jin Ping sa militar sang amo nga pungsod nga pabaskugon pa ang training kag preparasyon sang militar.
Kasunod ini sang tatlo ka adlaw nga war games sang China sa palibot sang Taiwan nga ila gina-claim nga ila pa nga teritoryo. Ang military exercises nga ginhimo sang Beijing — pagpadala sang jets kag warships — ang kasunod sang pagpakigkita ni Taiwan President Tsai Ing Wen kay US House Speaker Kevin McCarthy.
Ginsiling sang Chinese president sa Southern Theatre Command Navy sang People’s Liberation Army nga dapat depensahan gid ang territorial sovereignty kag maritime interests sang China kag himuon man ang tanan agud protektahan ang kabug-usan nga peripheral stability.
Ginpakamalaot man ni Xi ang plano sang US forces nga padamuon pa ang base militar sa Pilipinas lakip na ang isa nga nakaposisyon malapit sa Taiwan.
Subong nga semana nagapadayon ang pinakadaku nga joint military drills sang Estados Unidos sang Amerika kag sang Pilipinas kun sa diin nagkomiter pa si US Secretary of State Antony Blinken nga apinan ang Pilipinas batok sa anuman nga pagpamahog nga mabaton lakip na ang matabo sa West Philippine Sea.
