Ginpasigurado sang Estados Unidos sang Amerika nga ma-suplay sa Taiwan ang kinahanglanon sini nga mga armas sa tunga sang padayon nga pagpamahog nga ginahimo sang China.
Paagi ini sa pagbisita ni US Senator John Hoeven kay Taiwan President Tsai Ing-wen.
Suno kay Senator Hoeven, nagakahangawa ang Amerika sa nagakatabo sa sitwasyon sa Taipei bangud sa agresibo nga mga hilikuton sang China ilabi na ang bag-o lang nagtakop nga tatlo ka adlaw nga military drill sang Beijing kun sa diin may malapit 100 ka military aircraft kag 12 ka warships nga ginpadala sa palibot sang Taiwan.
Suno pa sa senador, gina-sigurado sang Amerika nga mapadala ang masobra $19.5 billion ukon masobra P1.07 trillion nga balor sang military hardware nga amo ang gin-order kag ginbayaran sang Taipei.
Sa bahin sang presidente sang Taiwan, ginpahayag sini nga magkaalyado ang Amerika kag Taiwan nga may pareho nga pagtamod sa demokrasya kag kahilwayan kag ginpasalamatan man sini ang Kongreso sang Estados Unidos sa pagpasar sang mga hagna agud nga mapa-uswag pa ang kapasidad sang Taiwan para depensahan ang kaugalingon nga teritoryo. ##
