Ipa-guwa na subong nga adlaw, Abril 14, ang resulta sang 2022 Bar examinations.
Suno kay Associate Justice Alfredo Benjamin Caguioa, chairman sang 2022 Bar exam, mahimo makit-an ang kumpleto nga lista sang Bar passers sa website sang Korte Suprema pagkatapos sang special en banc session subong nga Byernes.
Lakip man sa ipaguwa nga resulta amo ang madinalag-on nga Bar passers nga nakakuha sang 30 ka pinakamataas nga total averages amo man ang law schools nga nakaangkon sang lima ka pinakamataas nga Bar passers’ percentage.
Gin-abisuhan man ang Bar passers nga maghulat sa anunsyo kaangot sa clearance procedure amo man ang para sa Oath-Taking kag Roll-Signing sa Mayo 2, 2023.
Matandaan nga kabug-usan nga 9,183 ka law graduates ang nagkuha sang exam sang Nobyembre 9, 13, 16 kag 20, 2022 sa 14 ka local testing centers sa bilog nga pungsod.
Ang amo nga exam ang ikaduha nga digitalized kag regionalized bar exam nga gin-conduct sang Korte Suprema. ##
