ILOILO CITY – Indi nangin mahapos ang pagpanglakaton sang isa ka 2022 Bar exam passer antes malab-ot ang iya handom nga mangin abogada bangud sa ginasuprer nga depression kag anxiety.
Ini matapos nga napaslawan ini sa pagkuha sang pasinawan sa 2021 Bar Examination.
Sa interview sang Bombo Radyo kay Mary Patricia Alcantara-Basinang nga tumandok sang banwa sang Sara, iya ginpahayag nga kinahanglan niya dunganon ang trabaho bilang iloy, asawa, manunudlo, kag aspiring lawyer.
Sa matuod suno kay Basinang, naga breast feed ini sang iya anak samtang naga-review.
Ginpahayag dugang sang natungdan nga dako ang papel sang Ginoo sa iya Bar journey bangud nangin kaupod niya ini samtang nagakuha sang pasinawan.
Diri na kag ginbitbit ni Basinang ang rosaryo sa sulod sang exam room bilang tuburan niya sang kusog.
Sa subong, nagalaom si Basinang nga magamit niya sang maayo ang grasya sa pagpasar sa Bar bilang pagtuman sa plano sang Diyos para sa iya.
