ILOILO CITY – Indi upang ang edad agud makatapos sa pag-eskwela.
Ini ang ginpamatud-an sang isa ka 80-anyos nga lola nga ginakabig nga pinakatigulang nga graduate sang Alternative Learning System.
Sa interview sang Bombo Radyo kay Victoria Nuňez Arceňa, tumandok sang banwa sang New Lucena, iya ginpahayag nga nagpanikasog ini agud matapos ang iya pag-eskwela sa pagpati nga mas masanag ang bwasdamlag kun may yara sang ginakaptan nga diploma.
Suno kay Arceňa, indi nangin mahapos ang iya inagyan bangud nagsakripisyo anay ini kaupod sang iya nga bana nga nagatrabaho bilang panadero agud mapatapos sa pag-eskwela ang iya tatlo ka mga anak.
Ginpahayag dugang sang natungdan nga nangin bunga sang iya kabudlay ang pagpatapos sang iya mga anak nga lunsay mga professionals na subong.
Suno kay Arceňa, sang nakit-an sini nga yara na maayo nga kahimtangan ang iya anak, nagdesisyon ini nga magbalik sa pag-eskwela pinaagi sa Alternative Learning System.
Diri na kag nag-enrol ini sang 2016 kag nakatapos sang 2018.
