ILOILO –Pormal na nga magapungko bilang bag-o nga Bacolod City Police Office Director si anay Iloilo Police Provincial Office Director Police Colonel Noel Calderon Aliño subong nga adlaw.
Ini matapos ang ginpagwa nga General Order’s Number nga pirmado ni Police Colonel Winston de Belen, pinuno sang Regional Personnel and Records Management Division sa idalom sang PRO6-GD-DES-2023-2300.
Kun balik-balikan, gin-relieve sa posisyon si Aliño bilang director sang Iloilo Police Provincial Office bangud indi kumporme si Police Brigadier General Leo Francisco, director sang Police Regional Office 6 sa nangin performance sini sa pagsolbar sang mga krimen sa probinsya nga ginalakipan sang kontrobersyal nga Estancia Massacre.
Sa interview sang Bombo Radyo kay Police Major Mary Grace Borio, spokesperson sang Police Regional Office 6, iya ginpahayag nga pagabuslan ni Aliño si Police Colonel Thomas Joseph Martir nga natalana nga mag-retire sa masunod nga bulan.
Suno kay Borio, nagasalig man ini sa kapasidad ni Aliño nga matungdan niya ang katungdanan nga angot sa mga programa nga ginapatuman sang Philippine National Police.
