Gindakop sang mga pulis ang duha ka menor de edad nga amo ang ginatudlo suspek sa mass shooting sa Sweet 16 birthday party sa Dadeville, Alabama sa Estados Unidos sang Amerika nga ginkamatay sang apat ka mga tawo kag ginkapilas sang 32 ka iban pa nga yara sa amo nga pagtililipon.
Suno sa Alabama Law Enforcement Agency, matapos ang tatlo ka adlaw nga imbestigasyon kag pagpangita sa mga suspects, na-identify na ang mga ini nga amo ang 16 anyos kag 17 anyos nga mag-utod.
Pareho sila nga nagapangatubang sang kaso nga four counts of reckless murder.
Ang reckless murder natupa sa Class A felony nga may silot nga 10-99 anyos sa presuhan.
Wala pa sang dugang nga detalye nga napaguwa sa motibo sang duha sa pagpangluthang, apang may mga biktima pa subong nga yara sa ospital kag kritikal man ang kondisyon.
Ginpasalig man sang otoridad nga apisar pareho nga menor de edad ang suspects, iga-prosecute sila bilang adults.
Antes sini, una na nga nadakpan ang isa pa ka 20-anyos nga suspek nga si Wilson LaMar Hill Jr. kag ginpasakaan sang kaangay man nga kaso.
Ini ang isa sa pinakaulihi nga serye sang gun violence epidemic sa Amerika nga natabo pila lang ka adlaw matapos man ang mass shooting sa sulod sang bangko sa Kentucky kun sa diin lima man ang patay.
