Malapit 100 ka mga Pinoy sa Sudan ang nagapangayo sang bulig sa gobyerno sang Pilipinas sa tunga sang inaway sa tunga sang Sudanese army kag paramilitary forces sa Khartoum.
Suno kay Department of Foreign Affairs (DFA) Undersecretary Eduardo de Vega, 39 ang nag-request nga magapauli sa Pilipinas, samtang 47 naman ang naghingyo sang relocation.
Kun ang ahensya lang ang papilion suno sa opisyal, mas maayo nga papulion na lamang ang mga Pinoy sa Pilipinas bangud indi estable ang sitwasyon sa Sudan.
Ginkumpirma man sang ahensya nga may isa ka Pinoy nga injured matapos naigu sang bala apang amat-amat na ini subong nga naga-recover.
Ginabanta may masobra 500 ka mga overseas Filipino workers sa Sudan nga ang kalabanan professors sa international schools, company executives, engineers, kag may yara man sang domestic helpers.
Ginaplanuhan man subong sang ahensya kun paano mabuligan ang mga Filipinos bangud wala pa subong sang flights sa Khartoum.
Kun basehan ang report sang World Health Organization, malapit na sa 300 ang patay kag malapit 3,000 ang injured bangud sa ginamo sa tunga sang army kag paramilitary Rapid Support Forces sa amo nga pungsod.
