ILOILO CITY – Nagapati ang anay chairman sang Committee on Transportation sang Iloilo City Council nga wala sang illegal sa ginhimo si Iloilo City Councilor Sedfrey Cabaluna sa pag-isyu sang provisional authority para sa mga tricycle operators.
Ang paghatag sang provisional authority ang ginpanugyan sang Land Transportation Office suno kay Cabaluna nga gamiton anay sang mga tricycle drivers nga may expired nga registration.
Ini nga tikang ang ginkwestyon naman sang duha ka anay chairman sang Committee on Transportation nga sanday Councilors Romel Duron kag Plaridel Nava sa pag-isyu sang opisina ni Cabaluna sang provisional authority sa mga tricycle operators.
Suno kay Duron, makabig ini nga Grave Misconduct, Usurpation of Legislative Power, kag Malfeasance.
Ginpahayag naman ni Nava nga ang provisional authority ang gina-issue pinaagi sa ordinansa kag wala sang gahom si Cabaluna sa paghatag sini.
Sa interview sang Bombo Radyo kay former Iloilo City Councilor Atty. R. Leone Gerochi, iya ginpahayag nga wala man sang dapat baisan ang konseho.
Suno kay Gerochi, ang provisional authority nga gin-isyu sang opisina ni Cabaluna ang makabig nga Ultra vires ukon ‘beyond the powers’.
Nagakahulugan nga kinahanglan sang legal authority ang ini nga akto, apang matigayon sa gihapon apisar wala sang requisite authority.
Magluwas diri, makabig man ini nga surplusage ukon irrelevant.
Kuntani suno kay Gerochi, ginpatawag na lang si Cabaluna nanday Duron ukon Nava kun may yara sila sang kwestyon.
Nagapati naman ang natungdan nga ginhimo lang ini ni Cabaluna agud mabuligan ang mga tricycle drivers nga may expired na nga registration.
Gin-athag man sini nga ang pag-isyu sang prangkisa ang katungdanan sang Iloilo City Government kag ang registration sang salakyan ang trabaho naman sang Land Transportation Office.
