ILOILO – Nakabatyag sang pinasahi nga weather condition ang mga residente sang banwa sang Pototan kag Badiangan matapos nga naeksperyensyahan ang pag-ulan sang yelo ukon hail stones.
Sa interview sang Bombo Radyo kay Dr. Jerry Bionat, pinuno sang Iloilo Provincial Disaster Risk Reduction Management Office, iya ginpahayag nga nagakatabo ang hail storm bangud sa duha ka butang: kun may yara sang buhawi ukon tornado nga gin-updan sang cumulus clouds kag ang cloud formation nga tuman ka nubo.
Suno kay Bionat, sa tion nga makit-an ang madamol nga panganod nga masami matugnaw ang sa ibabaw nga bahin, diri na ka nagaumpisa ang pagporma sang yelo ukon ice, kag amo man ang pagbuyong sang hangin.
Ginpahayag dugang sang eksperto nga normal lamang ini, apang ginakabig nga pinasahi bangud malaka lang nga naeksperyensyahan.
