ILOILO CITY – Naghatag sang inspirasyon ang isa ka youth leader matapos nga ginpakigbahin ang importansya sang youth empowerment sa moderno nga panahon.
Sa interview sang Bombo Radyo kay Inri Dominic Flores, isa ka youth leader kag tumandok sang banwa sang Oton, iya ginpahayag nga gamay pa lang ini, nakit-an na niya ang potensyal bilang isa ka leader.
Diri na kag nangin kabahin ini sang student council sa ila eskwelahan.
Suno kay Flores, dako ang nangin papel sang Red Cross Youth agud mapasanyog ang iya leadership skills bangud diri nabuksan ang madamo nga oprotunidad para sa iya.
Sa matuod, nangin tiglawas si Flores sang Pilipinas sa mga international conferences agud maghatag sang oportunidad sa mga pamatan-on nga pasangkaron ang tagsa nila ka mga abilidad.
Ginpahayag dugang sang natungdan nga gingamit niya ang halimbawa kag estratehiya sang kaupod nga delegates agud i-adopt kag mapasangkad ang Red Cross Youth sa Pilipinas.
Nagpanugyan naman si Flores sa mga pamatan-on nga indi upang ang edad agud makahimo sang pagbag-o sa kalibutan, basta may yara lang sang pagsalig sa ikasarang, mahimo nga mangin instrumento sang pagbag-o kag pag-uswag.
